.
.
قبل سنواتٍ ليست بالبعيدة .. كان ذلك الطالب الذي يبعد كثيراً عن الطب، واليوم هو الطالب الأول علمياً على الدفعة السادسة في كلية الطب .
مُجتهدٌ .. ذو القلب الطيب كما يصفه أصدقاؤه المقربون والشخص الذي يحب أن يقدم الخدمة للجميع .
أحمد الصيَّاح .. في بصراحة يكشف عن قصة الحب التي عاشها وما سبب فشلها ؟ ما الأمنية التي سيطلبها من مارده السحري وما سر تحوله من مهمل إلى ناجح علمياً ؟
قدوته في الحياة .. وما سلبية عميد الكلية د. نذير إبراهيم، من يُفضل بين حمامي ومغربي والمزيد في هذه المقابلة ..
.
.
✿ سـ : مرحبا أحمد .. اذا قلتلك احكي عن صياح بسطرين ، شو رح تقول ؟
احمد صفي الصياح عمري 24 سنة من مدينة الميادين بريف دير الزور من عائلة مكونة من 9 اخوة ترتيبي بالعيلة الثالث .. نشأت ببيئة متعلمة والدي جامعي ووالدتي مدرسة والها فضل كبير علي بتعليمي.
لحد الأن انا الوحيد اللي بيدرس جامعة من بين اخواتي، إنسان عادي جداً وبسيط جداً أكثر مما بتتصور
▂▂▂▂
✿ سـ : أحمد بآخر فصلين هو الأول ع الدفعة علمياً .. شو اللي تغير بحياتك حتى تحولت من طالب مهمل ( كما في السنوات الأولى ) إلى طالب مُجد بل والأول ؟
انا ببداية السنة الخامسة كنت حاطط ببالي هالشي واشتغلت عليه بكل بساطة يعني ماكان هيك صدفة اما اللي خلاني اتحول من مهمل الى مُجد فهو صعوبة الظروف اللي مر فيها اي انسان بهالأزمة وثاني شي اني بحياتي اللي قبل الجامعة ماكنت ابدا انسان كسول أما اهم شيء هو حس المسؤولية انو انا لازم اتعلم وعوض كلشي فاتني بالسنين الماضية لانو مابيصير طبيب بدون مسؤولية.
إلى جانب بل وقبل هذا .. ما بنسى الإنسان اللي أثر فيني جداً .. هو محمد ضياء اكثر انسان شجعني ودعمني واتعلمت منو المسؤولية بشكل لايوصف .
▂▂▂▂
✿ سـ : ما إعراب الحب في حياة أحمد صياح ؟
الحب شي ضروري لأي شخص بهالدنيا، أي انسان بمرحلة من حياتو بيحتاج للحب وانا مش طفرة عن البشر
▂▂▂▂
✿ سـ : مين هو الشخص اللي بيعرف انك متدايق من غير ما تحكي ؟
بهالفترة ومن ضمن الجامعة فهم اثنين ضياء ( طالب خريج من الدفعة السابقة ) الله يسرلو وحاليا عبد الرزاق
▂▂▂▂
✿ سـ : كتير عالم حكت عن صياح من ورا ظهره ووصلك هالحكي .. ومع هيك لما كانوا يجوا بوجهك ويطلبوا منك أسئلة وما شابه كنت دائماً تعطي .. طيبة قلبك بتدايقك ؟
اخي مافي انسان كامل بهالدنيا يعني كلنا بشر .. وبالأخير شو ما انحكا فصدقني انا بنساه وما بحطلو اعتبار لاني لو دايقني حكي اي شخص فبمجرد مابيسلم علي او شوفو بنسى كلشي.
مابتدايق من طيبة قلبي أبداً بس بتدايق لمن حدا بيستغبيني وبيفكرني انو مو عارف شو في لاني بكون مطنش ! بس صدقاً ما بشيل بقلبي على حدا ابدا
▂▂▂▂
✿ سـ : البعض بيشوف أنَّه عندك بعض الفوقية العلمية والغرور اللي بتترجمه بالسخرية من الدرجة العلمية للبعض .. شو تعليقك ؟
فوقية بيجوز هيك بتنفهم، بس هي السخرية اللي بينحكا عنها بتنطلق لما بتكون المعلومة اللي قالها حدا كفر بالطب، اما شغلة انتقاص من درجة حدا فهي شوي بعيدة عن الواقع لانو انا بتعلم من بقية الطلاب كثير شغلات وبنبسط فيها
▂▂▂▂
✿ أحمد صياح في كتير ناس مُستحيل يهضمها .. مع هيك بيضحك وجههم ، هل هذا نفاق اجتماعي ؟ أم ماذا ؟
اذا بتحب تسميه هيك فأنا بقلك التسمية شوي قاسية لانو الدنيا بدها تمشي وقاعدتي انو نحنا كطلاب اليوم مع بعض وبكرا الله اعلم وين يعني مابحب ازعل من حدا او حدا يزعل مني برغم اي شي
▂▂▂▂
✿ رتِّب لي أفضل 5 أسماء من الناحية العلمية بالدفعة ؟ بما فيهم انت .
* اعتذر عن الترتيب .. بالقول :" كل واحد اله ميزته ".
▂▂▂▂
✿ لو قيل لك ستتدرب تحت يد واحد من هؤلاء من ستختار : نذير ابراهيم .. سامر الآغا .. سهام سليمان ؟
كلمة ستتدرب مقصود عمليا فيها وهذا الشي اللي ماجربتو عند الدكتور سامر لذلك اكيد بحب ان اتدرب معاه
▂▂▂▂
✿ مين من صحابك بالجامعة، بتعرف أنَّه اذا حكيتله سر فهو بئر لا يبوح ؟
بالجامعة يا سيدي اذا في حدا بيعرف اسراري فهو احمد ابوقورة
▂▂▂▂
✿ بدك تطلع مشوار لتنبسط ولازم تطلع فقط مع زميل واحد بالكلية .. مين رح تختار ؟
بختار جندل
▂▂▂▂
✿ د. نذير ابراهيم .. بين الإيجابيات والسلبيات ؟
د نذير انسان طموح جدا اما سلبياته التمييز بين الطلاب بالنظر للعلامات لا للمستوى العلمي للطالب
▂▂▂▂
✿ مع الخطوبة والزواج لطالب الطب في أثناء الدراسة .. وعلل إجابتك ؟
الخطوبة والزواج يا سيدي كل واحدة لحدا يعني الزواج انا ضدو اكيد اما الخطوبة باخر سنة فانا معاها للي مرتاح ماديا وبيكون بحاجة لأستقرار عاطفي
▂▂▂▂
✿ أحمد عاش قصة حب سابقة ، هل كانت جامعية أم خارجها ؟ وما سبب فشلها ؟
قصة حب خارجية سبب الفشل بصريح العبارة كان عدم قدرة العلاقة انو تنتهي بشيء واقعي بسبب العادات والتقاليد والبيئة المختلفة
▂▂▂▂
يعني هي فيك تسميها مراهقة اكثر من حب وبيجوز لأنو من أول علاقة مع بنت وتحولت لشيء يشبه الحب بيجوز كانت بدافع الحاجة للحب اما بالنسبة لانو قرايبتي او زميلة فلاهي ولا هي هي خارج كل هالنطاق تعرفت عليها من جوار بيت يعني (موبالمزة)يعني سابقا طبعا اعترفتلها وهي نفس الشي بس قلتلك ماكان في عندي نضج فكري بهالموضوع.
يعني كانت بالنسبة الي مجرد مراهقة بس تجربة حلوة والها فضل علي كبير وهي من الدوافع السلبية اللي انا بتدفعني بالحياة وكانت فترة انتهاء القصة ببداية السنة الرابعة يعني كانت من الأشياء اللي كنت حابب جربها بحياتي وجربتها والتفت بعدها لأمور دراستي بشكل اكبر.
يعني من الشغلات الحلوة بحياتي واللي مابندم عليها بالعكس علمتني كثير
▂▂▂▂
✿ سبق وحبيت حدا من بنات الجامعة ؟ أو اُعجبت فيها ؟ وهل صارحت حدا ؟
▂▂▂▂
✿ أقرب 3 طلاب لك في الدفعة ؟
اقرب ثلاثة ابوقورة وزهير وابوصلاح
▂▂▂▂
✿ لو كنت بسفينة عم تغرق مع الثلاثة .. مين بتنقذ ؟
ابوقورة لأنك ما بتعرف تسبح :P
▂▂▂▂
✿ كيف ممكن تتعامل مع قصة حب من طرف واحد بحيث البنت بتحبك وهي جداً محترمة لكن قلبك ما مال لها ؟
قصة حب من طرف واحد هههههههههه مابعرف بس بيجوز اني حاول اتجاهل هالشي واتجنبو
▂▂▂▂
✿ إلى أي مدى ممكن توافق على قضية التحرر وأنَّه البنت تكون صداقات وتطلع وتجي مع الشباب ؟
قضية التحرر هي قضية نسبية وبالنسبة الي مفهوم التحرر اللي عم يتروج بالعالم الأسلامي (وليس العربي) هو مفهوم الأنحلال الأجتماعي ولكن عم يكون بالتدريج ومو دفعة وحدة يعني اثارو بلشت تظهر بمجتمعنا بشكل واضح وبالأخير البنت المحترمة والواعية بتعرف كيف تحط حدود لعلاقاتها مع الناس بشكل عام
▂▂▂▂
✿ إلى أي مدى حياة صياح محصورة بالطب فقط وبعيدة عن مجالات أخرى ؟
حياتي ماكانت محصورة بالطب قبل هالسنتين بس بسبب الظروف وانو لازم خلص واتخرج كان لازم ابتعد عن كل شي واحصر حياتي بالطب (أنا قبل هالسنتين كنت صايع لدرجة مو طبيعية واخر شي كان فكر فيه هو الدراسة والطب هههههههههه )
▂▂▂▂
✿ شو هو العيب اللي بتتمنى تتخلص منه بشخصيتك ؟
اكثر شي بتمنى اتخلص منو هو اللامبالاة بأمور الحياة
▂▂▂▂
✿ لو بيرجع فيك الزمن بتدرس طب ؟ وشو هو الشي اللي عملته بحياتك وندمان عليه ؟
▂▂▂▂
✿ طلع لك مارد بأمنية واحدة بعيدة عن الطب والنجاح به .. وأمنية دنوية ، ماذا ستختار ؟
امنية وحدة صدقني مافي احلى من انو كون مع اهلي وناسي وافرح معهم ماحدا بيعرف معنى البعد عن الأهل اللي ذاقو (لأنو صارت شوفة اهالينا حسرة )
▂▂▂▂
✿ احمد انت من الناس اللي وقفت سنة .. برأيك كان هالشي إيجابي ولا سلبي ؟
والله مافي شي بهالدنيا اثر فيني مثل ما اثرت فيني سنة التوقف بصراحة الفضل لأبي بوقتها لأنو علمني بهالوقت كيف انو الحياة صعبة وخلاني اتعلم الصبر لانو فهمني شو يعني الحياة (أنا بطبعي سابقا انسان متسرع جدا جدا وماعندي صبر ابدا )
▂▂▂▂
✿ شو الشي اللي ممكن يخلي أحمد صياح يبكي ؟
الشي اللي بيخلي صياح يبكي (كثير والله ) بس ماشرط الأنسان يبكي ظاهريا :) اما اكثر شي بيبكيني هو الظلم لو حتى شفت انسان قدامي مظلوم ممكن ابكي هاد مابتحملو
▂▂▂▂
.
✿ الواقع × الحلم
الحلم
▂▂▂▂
✿ المدرسة × الجامعة ( مين أجمل )
المدرسة
▂▂▂▂
✿ التفاؤل الكاذب × التشاؤم الصادق
التفاؤل الكاذب
▂▂▂▂
✿ تحب × تنحب
أحب
▂▂▂▂
✿ الحزن × الفرح ( ما بتنسى ؟ )
الفرح
▂▂▂▂
✿ القهوة × الشاي
الشاي
▂▂▂▂
✿ المدينة × الضيعة
الضيعة
▂▂▂▂
✿ فرحة وحزن × فرحتين وحزنين ( وليش ؟ )
فرحة وحزن اخي من مبدأ انو اكثر من ضربة عالراس بتوجع
▂▂▂▂
✿ فيلم × مسلسل
مسلسل
▂▂▂▂
✿ خالة مرت أب × زوج أم ( مين أصعب ؟ )
زوج أم
▂▂▂▂
✿ هشام حمامي × محمد مغربي
مغربي
▂▂▂▂
✿ محمد خير × محمد وكاع ( بمسابقة طبية، مين بتختار يكون شريكك ؟! )
وكاع
▂▂▂▂
✿ المال × الحب
الحب
▂▂▂▂
✿ الوداع كل فترة × فراق أبدي
الوداع كل فترة
▂▂▂▂
✿ زواج الأقارب × بعيد عن الأقارب
بعيد عن الأقارب
▂▂▂▂
✿ عمار قصار × برنار خازم
عمار قصار
▂▂▂▂
✿ بيبسي × عصير
عصير
✿ زهير جمعة
زهير ابو محمد انسان طيب كثير وخدوم كثير واهل للعشرة بس لو يبطل أهمال ولامبالاة
▂▂▂▂
✿ أحمد الجنادي
الجنادي بحسو مزيج من التناقضات وبوصفو بالطير الذي يرقص مذبوحا من الألم واجدع ناس والله من الناس اللي بيرسمو الابتسامة على وجوه الكل
▂▂▂▂
✿ محمد الغصين
الغصين انسان هادي كثييييييير وراقي ومحترم وشاطر لا أعرف اكثر من ذلك
▂▂▂▂
✿ علي الجوابرة
علي جوابرة علي من الشباب اللي تعاملهم جدا حلو انا بحسو صريح وبيعرف يدبر حالو
▂▂▂▂
✿ ربى الجهماني
ربا الجهماني اطيب انسان شفتو بحياتي وابسط انسان بحس فيها براءة الطفولة
▂▂▂▂
✿ لين نور الدين
لين نور الدين هي من جماعة cmds هههههه لا بس انسانة لطيفة جدا وشبابية
▂▂▂▂
✿ مظهر الجاسم
مظهر يا مظهر شو بدي احكي هاد راح صارحو اكثر شي ههههههههههه مظهر شوي متغير عن مظهر اللي بعرفو قبل وغير هيك فهو انسان طيب جدا وفهمان جدا وبعزو كثير لابو عمر هو من الناس اللي بيتحملو غلاظتي .
▂▂▂▂
✿ عدي الدعاس
عدي دعاس شخص مجتهد كثير وفهمان وبيتعب
▂▂▂▂
✿ جمال حوري
جمال حوري شخص راقي بيجوز قبل هالسنة ماكثير كان اختلاطي فيه فيه شغلة الخجل شوي بس هالفترة عم يتخلص منها هي والتردد
▂▂▂▂
✿ حسام اللحام
حسام اللحام شب اكابر ومجتهد بحسو مظلوم بهالجامعة يعني ما عم ياخذ حقو
▂▂▂▂
✿ سعد الفرطوسي
الأستاذ سعد الفرطوسي مهما كتبت لن أوفيه حقه هو من الأشياء الجميلة جدا بحياتي هالسنة يعني كل لحظة معاه بتعنيلي كثير هو قدوتي بكل شيء معزتو كثير كبيرة والله اعلم بحبي الو
▂▂▂▂
✿ محمد الطيبي
محمد الطيبي شخص مابعرف عنو كثير بس بصراحة مستواه جدا رائع بالنسبة لشخص كان موقف سنتين عندو معلومات كثير ومجتهد كثير وفهمان
.
.
ليست هناك تعليقات :
اضافة تعليق