لورانس يونس ذو الإبتسامة الدائمة و ( الحشري ) أحياناً ، يبوح لـ " بصراحة "

.
.

إذا ما كان البحث عن المُبتسم دوماً .. الطالب الذي لا تُفارق البسمة مُحياه والذي جمع صداقة الجميع لأنَّك من الصعب أن تجد للكره في قلبه مكان .

فهذا الإسم الذي يجب أن يكون نتيجة لهذا البحث سيكون بالطبع .. لورانس يونس .

أحد الوجوه التي كان مُقرراً لـ عام 2016 أن يحمل اسمها ضمن قائمة الطلاب الذين سيتخرجون من الكلية بها .. وبصراحة كان له وقفة خاصة مع لورانس باح فيها الأخير بالقليل مما في قلبه .

فيما يلي .. ما جرى في مقابلتنا معه ..

.
.





✿ عرفنا عن حالك أكتر لورانس ؟

أسمي لورنس اكرم يونس مواليد دمشق1990 ابي من القامشلي وامي من مدينة السويداء

▂▂▂▂▂

✿ احكيلنا شوي عن عائلتك .. كم أخ عندك وكم أخت وأهلك وين حالياً ؟

عندي اخ بشيكاغو عم يلعب بفريق كرة القدم الامريكية(ريكبي) وعندي اخت مزوجة بتركيا و اخ واختين اصغر مني كمان بأمريكا

▂▂▂▂▂

✿ اذا قلتلك احكي عن لورانس بأسطر قليلة .. شو بتوصف حالك ؟

لورنس فيني اعتبر انو انسان مر بمراحل صعبة بحياتو وانا واثق ماحدا مر فيهااا
وتخطيت كتيير تجارب قاسية ماقدرت تغير شي فيني ابدااا
يعني لورنس ٢٠١٦ نفسو لورنس١٩٩٠ 
مابحب اوصف حالي

▂▂▂▂▂

✿ تحكيلنا عن شي تجربة من هالتجارب الصعبة ؟

راح احكيلك اخف وحدة اجت ايام علي كنت وحيد بكل معنا الكلمة يعني من ناحية بعدي عن ابي وامي ومن ناحية تانية لقيت كل يلي حواللي مشغول بهمومون ومشاكلون يعني كنت معزول عن الطرفين وبالحياة اصعب شي انو هي الوحدة انا من النوع الي بحب اسمع كتير اراء يلي حوالي وبوازن بيناتون وبقرر ماكان في شي من هاد ابداا.

كنت دايماا بفكر وانا عم امشي لوحدي وبالاخص بالليل والسكون وكنت صبر حالي واقنع حالي واخلق الامل لحالي وحتا لما كنت افشل كنت دايما اقول مو نهاية العالم واعطي فرصة تاني لحالي لحتا اخلص منها وصلت لمرحلة ادمنت فيها علا هالعادة كلما انزعج او تواجهني مشكلة تلاقيتي لا اراديا ا اطلع واتمش لحالي احيانا كانت تطول ساعات وكنت حس بىاحا وبنفس الوقت بحل المشكلة بطريقة صحيحة راح تحسني غريب شوي صح

▂▂▂▂▂

✿ ايمتا دحلت كلية الطب .. وهل دخلت عن قناعة ؟

انا من دفعة 2008 ، اه عن قناعة

▂▂▂▂▂

✿ اديش وقفت عن الدراسة ؟ وكيف قضيت هالفترة ؟

ظروف قاهرة اجبرتني اني وقف دراسة لسنتين اضافة للظروف يلي كانت تمر فيها الجامعة بسسبب الازمة وتوقف الدوام بصراحة اكتر سنتين كنت متحرر من واجبات والتزاماات، كنت عم داوم بالمشفا الوطني بالقامشلي وبعدين طلعت علا تركيا كنت عم اشتغل مع شركة سياحية بباطمان واسطنبول وبورصا وانطاليا ( شركة خالي) وبعدها كان لازم ارجع كمل دراستي ورجعت والحمدلله كملت 

▂▂▂▂▂

✿ اديش الفترة اللي قضيتها بمشفى القامشلي ؟

9 شهور

▂▂▂▂▂

✿ احكيلنا عن مواقف ما بتنساها بهالفترة ؟

خاي مرا كنت مناوب بالمشفا والساعااا ١٢ صرت اتمشااا بالشعبة شفت بنتين اخوات كانو قاعدين مع امون وكانت الام نايمة دخلت من الباب وكان يحكو ومو شايفيني وراهون

ولا الاخت تقول للتانية والله لينخرب بيتنا وبكرا بتشوفي وانا بطبيعتي شوي حشري😂 وقفت وصرت استمعلون ..

قالت:ماضل شباب بالبلد والي هاجر والي هرب والي راح عالجيش ماضل مستقبل

وحدة منون طلعت لورا شافتني ضربت ايد اختهاا وطلعت اختهاا كمان

اول مرا كنت حس حالي عامل جريمة ومابقا اعرف بشو اتحجج مابقا طلع مني كلام

 قام قلتلون صوتكون عالي وعم تزعجو العالم وازا ضليتو هيك بتطلعو لبرا وانسحبت انسحاب تكتيكي

ومابقا دخلت الشعبة لحتا تخرجت امون من المشفا😂😂

▂▂▂▂▂

✿ خلال مسيرتك بالطب، مين أكثر دكتور أثر فيك وحببك بالطب ؟

كتير دكاترة رائعين من حسن حظي درسوني بس الدكتور يوسف بركات كان نقطة تحول كبيرة بالنسبة الي

▂▂▂▂▂

✿ شو السبب اللي خلا دكتور يوسف في المقام هذا ؟

كان متل تحدي كبير الي مادتوو وطريقة تفكيرو وتدريسو علموني كيف ادرس لانو بصراحة اي مادة كنت ادرسها قبل ما ادرس عندو كنت بطلع من الامتحان وانجح فيها بس مابتزكر منها شي

▂▂▂▂▂

✿ شو إعراب الحُب بحياة لورانس ؟

اول شي الحب بتوهبو الك الحياة لاتبحث عنه بنفسك لانه لن تلقاه الحب الو اقسام كتيرة بقناعتي واحد منون ماراح تلاقيه الا بعد الزواج والي هوة حب الشريك هاد النوع بالزات بحسو كزب قبل الزواج .

▂▂▂▂▂

✿ يعني مع الحب ثم الزواج .. او الزواج ثم الحب ؟

التنين يمكن يكونو صح بس الي راح ينجح وبكل تاكيد هوة التاني لانو ازا صار حب بعد الزواج راح يكون ابدي

▂▂▂▂▂

✿ عشت قصص حب بحياتك لهلأ ؟

وحدة وفاشلة كتير كانت وصعبة كمان، لأنو كانت بوقت غلط

▂▂▂▂▂

✿ مع الإرتباط أثناء فترة الدراسة أو لا ، وليش ؟

مع ازا كان في قواسم مشتركة وتفاهم بس نحنا طلاب الطب مصلحچية بصراحة نضرب بعرض الحائط كل عواطفنا بمجرد تعارضت شوي مع مستقبلنا لاحدا يقول الا أنا😂 حارتنا ضيقة ومنعرف بعض😂😂😂

▂▂▂▂▂

✿ مين برأيك أقوى طلاب من الناحية العلمية بالدفعة ؟

حسب رأي المتواضع في الاغلبية يلي وصلو للسنة السادسة بعتبرون اقوياء لانو مرو بامتحانات صعبة وانتا بتعرف هالشي ومو كل واحد بيوصل لهون اما الاقوا فاعتقد الوطني راح يعطيك الجواب الاكيد لانو في زملاء عندون علامات متوسطة بس معلوماتون اكبر بكتير من علاماتون

▂▂▂▂▂

✿ شو راسم لورانس لمستقبله بعد التخرج ؟ ناوي تكمل بسوريا .. تطلع لببرة ؟ شو الاختصاص اللي بتتمنى تختصه ؟

بصراحة مجهول وجهتي بس اكيد راح بلش الاختصاص بسورياا

مافي اختصاص معين بس : ازن انف حنجرة، ج.تجميلية، ج.اوعية، هدول حاليا ضمن اولوياتي

▂▂▂▂▂

✿ أقرب 3 طلاب الك بالدفعة ؟

المجموعة5 بالتدريب السريري هي اقرب طلاب الدفعا الي واضافة للطلاب الجدد انضافو الي المجموعا كتير كنت مبسوط انو جمعتني الحياة فيون طيبي ع.الحبشي و علي

▂▂▂▂▂

✿ مين من صحابك بالجامعة بتعتبره بئر .. اذا بحتله بسرك ما بيطلع ؟

مروااااا

▂▂▂▂▂

✿ في صفة بيقولوها البعض عنك بتسعدك ؟

مافي شي محدد بس كل الصفاة الحلوة بتسعدني :P 

▂▂▂▂▂

✿ وفي صفة بتشوفها سلبية بشخصيتك وبتتمنى تغيرها ؟

حشري شوي

▂▂▂▂▂

✿ شو الشي اللي ممكن يخليك تدمع ؟

الخيانة ، بتوجع كتييير كتييير

▂▂▂▂▂

✿ أديش كان معدلك بالبكلوريا .. وبعدها قدمت مفاضلة دمشق ولا بسرعة ع الخاص ؟

227 ، مباشرة إلى الأمام سر ع الخاص

▂▂▂▂▂

✿ كيف علاقتك مع الأغاني :) .. مين مطربك المفضل وبتفضل العربي والأجنبي ؟

بحب الاغاني كتير، نادراا مابسمع اجنبي

اليساا بالدرجة الاولى بعدين سيرين عبدالنور و وائل كفوري نادرا بسمع اجنبي

✿ الدفعة الحالية × دفعتك الأساسية

الدفعة الحالية لانو فيها متل جو عائلي بس قلة العدد عكس الدفعا السابقة

▂▂▂

✿ د. حمامي × د. نذير

د. نذير

▂▂▂

✿ السهر × النوم بكير

النوم بكير

▂▂▂

✿ الدجاج × اللحمة

الدجاج

▂▂▂

✿ القهوة × الشاي

شاي خمييير

▂▂▂

✿ 3×1 × ميلو

ميلو

▂▂▂

✿  تشاؤم صادق × تفاؤل كاذب

تفاؤل كاذب

▂▂▂

✿ تحب × تنحب

أحب

▂▂▂

✿ سامر الآغا × د. سعد الفرطوسي

سامر الآغا

▂▂▂

✿ هوليوود × بوليوود

هوليوود

✿ رافي واصل

هاد انسان فاهم الحياة بمفاصلها بس شايل السلم بالعرض

▂▂▂

✿ مروة هنا

حكاية لحالها احس انو في كتير صفات مشتركة بيني وبينهااا بس ال لامبالاة عندها توب
الها صفات قليل ناس يملكوها مرحة متفائلة رغم البلاوي ومابتفوت لحظة حلوة بدون ماتعيشها

▂▂▂

✿ عبد المالك الحبشي

وديييع :D وبيتعب عدراستو بس ٢٤ مكتئب

▂▂▂

✿ محمد الطيبي

محبوب وبيعرف كيف يدخل للقلب عندو قدرا مو طبيعية علا اخفاء سلبيات

▂▂▂

✿ سامي فاخوري

لما تشوفو تحسو معقد بس بس تتعامل معو بداخلو انسان طيب كتير وصديق لا يعووض وبيحب المساعدة دون مقابل بس مهمل كمان

▂▂▂

✿ طارق قضماني

رجل بمعنا الكلمة بعرفو من زمان صدقا ولا سلبيه لقيتها فيه

▂▂▂

✿ عبد المسيح يعقوب

يتعب بالدراسة بس الحظ دايرلو ضهرو ومحبوب ومرح كتيير واربع وعشرين ساعة بيأف أف ويندب حالو لأنو مابيعجبو شي

▂▂▂

✿ وسام الحسن

محبوب كمان ازا تشوف من بعيد تحسو معقد بس انسان بسيط كتير ويمكن يخدمك حتا لو ضر حالو بدون مايعرفك ابداا وازا انزعج منك نصيحة ضب غراضك وقدم لجوء لألمانية

▂▂▂

✿ براء مرعشلي

يتعب عحالو كتير بس حظو مدري وين ضايع منو طيوب محترم للصداقة كتير بس كمان الكأبة والسوداوية محتليتو احتلااال

▂▂▂

✿ جمال حوري

جيمو الرومنسي عم يحاول يتخلص من خجلو واتمنالو النجاح محبوب كتير مايعرف يكزب وبس كزب عليك طلع بعيونو تلاقيون يخبروك انو عم يكزب وخوف من الفحص الوطني عم ينام ويشرب معاه

.

.

حاملة رسالة " العفوية " والباحثة عن الترتيب والأناقة .. مرام سليمان ضيفة ( بصراحة )

.
.

بصراحة يعود من جديد ليتجول بين أوراق طُلاب دفعة الطب في سنتها السادسة .. وهذه المرة مع الفتاة ذات القلب الطيب والتي عادةً ما تأخذ على عاتقها مهمة حمل رسالة العفوية والطيبة .

مرام سليمان .. وحلقة جديدة تفتح من خلالها قلبها لـ ( بصراحة ) .. تتحدث عن تجربتها الخاصة التي قضتها إبان سنتها الثانية في الكلية في الهلال الأحمر .. و3 موتى !

تحكي أيضاً قصة ساعة من التحضير قبل الخروج من المنزل، بيت سرِّها وأقصى عقوبة تعرضت لها من والديْها، والشيء الذي يلفت نظرها في شابٍ أو فتاة والمزيد .









✿ عرفينا عن حالك أكتر !؟

مرام سليمان مواليد سبتمبر 1991 .. مواليد التل المشفى العسكري كان يوم اسود إجيت عالدرج لإنو ضاع المفتاح وانسرقت ديارتي ولفوني بشاش وكان بالمختصر يوم فقر ع عيلتي :D


▂▂▂▂▂


✿ أي دفعة حسيتي فيها بالراحة أكتر ، دفعتك الأساسية ولا الدفعة الحالية ؟

ولا بوحدة منن يمكن بس بهالدفعة كنت إجتماعية اكتر، لإنو قبل ماكنت قرب عحدا ولا حدا يقرب علي، ويمكن بهالدفعة تعلمت كتير اشياء .

بس للصراحة بنفس الوقت انبسطت بهالدفعة وكنت حابة الدوام، عرفت ناس طيبين كتير ومارح إنساهن اكيد.

▂▂▂▂▂

✿ متل شو الأشياء اللي علمتك ياها فترتك الجامعية ؟

مابعرف كيف إشرحلك، بس تعلمت أنَّه مو لازم الواحد يكون عفوي ولازم ينتبه ع تصرفاتو اكتر.. عالعموم من كل شخص تعلمت شي.

▂▂▂▂▂

✿ دخلتي الطب عن قناعة ؟

إي طبعا قناعة كاملة ومن السنة الأولى بلشت إشتغل بالصيف بمشفى الهلال الأحمر

▂▂▂▂▂

✿ بعد التخرج، شو الإختصاص اللي ناوية عليه ؟

نسائية او اطفال او جراحة تجميلية، وبتمنى لو إقدر سافر ع اميركا وإقدر إختص هنيك

▂▂▂▂▂

✿ كلنا بنعرف أنه بعد التخرج كتير بيخف التواصل بين الزملاء .. اذا قلتلك عطيني  5 أسماء بتظني ما رح تنقطعي عن التواصل معهن ، مين بتختاري ؟

محمد وكاع، مظهر، احمد ابو قورة، نادين و جنادي .. هدول اقرب شي .

▂▂▂▂▂

✿ 3 أحلام دنيوية راسمتيها لحالك بعد التخرج ؟

1. صير طبيبة ناجحة وإلي إسم
2. عوض إمي عن كلشي 
3. عيش حياة حلوة نضيفة بعيدةعن الكزب والنفاق وكون راضية ربي أهم شي

▂▂▂▂▂

✿ في حدث بحياتك من الماضي مستحيل تنسيه ؟

في كتير بس احلى واحد فين إنو مرة كان واحد متصاوب وقدرت ساعدو وعاش، كنت سنة تانية، وقتا حسيت إني عملت شي مفيد


استمرت سنتين ورا بعض باإسعاف تعلمت فيها كتير إشيا وساعدت كتير واول يوم فتت فيه عالمشفى ماتو 3، ههههههههه، كنت يعني ببداية الطريق بس ماكنت خاف تعلمت كون قوية فيها مافي شي محدد بس كنت حاسة ب مسؤولية كتير وكنت خاف إبتلى بشي حدا بس ماصارت

▂▂▂▂▂

✿ موقف محرج .. وآخر مضحك صاروا معك بحياتك الجامعية ما بتنسيهم ؟

موقف محرج إني مرة ضعت وانا راجعة عالبيت بالسنة الأولى وصرت إبكي نزلت بمكان غير مكان وضليت واقفة لإجو اهلي من التل .

▂▂▂▂▂

✿ هل بتتابعي مسلسلات ؟ إن كان نعم عربي أم أجنبي واحكيلنا شو أفضل شي تابعتيه ؟

من النادر لتابع واكيد عربي وشي كوميدي متل دنيا عيلة سبع نجوم هيك او توم وجيري وفي ابو الهنا كنت حبو

▂▂▂▂▂

✿ رأيك بالتدخين ؟ وهل بتتفقي مع القائل بأنَّ التدخين للرجل خطيئة وللمرأة أم الخطايا ؟


بالآخر هيي حرية شخصية بس انا بقرف من الدخان ( سجاير)  مابحب ريحتو، ك سجاير انا بكرها للشب وبقرفا للبنت

▂▂▂▂▂

✿ وانتي بتدخني ؟

اركيلة ممكن بس تنفيخ مو تحشيش ومو ديما ومو مع كل الناس يعني بطريقة محترمة بدون حركات.

▂▂▂▂▂

✿ مرام ست بيت ؟

لااااا أبدا بكره الطبخ والمطبخ وفاشلة فيهن كتير، بس بحب الترتيب والأناقة كتير، نص نص.

▂▂▂▂▂


✿ ممكن تتعلمي هالشغلات مع المستقبل لما ترتبطي ؟ ولا حتكوني من الناس اللي بيعتمدوا ع الشغالات ؟

لااا مو مع إني فوت شغالة عالبيت يعني ممكن جيبا كل إسبوع بس مو كل يوم بحب انا اعمل كلشي لحسس عيلتي إني معن بكل شي.

وحتى إذا فكرت وغيرت رأيي ف ممكن تنضيف بس اما اكل وتياب وهيك بحب يكون إلي انا بصمة فيهن بس اهم شي يجيني واحد بسيط ومابحب بطنو ويكون صبور علي لإنو رح تطلع عينو :D

▂▂▂▂▂

✿ شو هي أسوأ عقوبة تعرضتي لها من والديكي أثناء طفولتك ؟

كنت كل خميس إلي روحة عالملاهي او طلعة ع بيت جدو، موتني ولاتقلي مافي، كنت ضل إبكي طول اليوم ضليت للبكالوريا، هي نقطة ضعفي او يعتبروني مو موجودة ويطنشوني وانا إحكي مع حالي وماما كانت تخوفني من إم علي هي وحدة كانت ترعى غنم وتقلي انا رح اعطيكي ياها وماعاد بدي ياكي بنتي خليها تنيمك مع الغنم بالشارع والفلفل الأحمر ههههه.

▂▂▂▂▂

✿ البنات معروفين بهوسهم بالوقوف أمام المرآة قبل الخروج من المنزل ، كم الوقت اللي بتاخذيه لتزبطي حالك قبل المشوار ؟

ساعة إذا كنت مستعجلة بدون قهوة وساعة ونص مع قهوة واغاني طبعا حسب المشوار يعني مو ديما، بس أقصى حد يعني ساعة.

بحب الأناقة وبحاول كون مميزة بس بدون زيادة ويكون اوفر.

▂▂▂▂▂

✿ بلد عربي آخر أجنبي بتتمني تزوريهم بأقرب فرصة ؟

بلد عربي لبنان حابة إطلع لهنيك واجنبي اميركا وحاليا رح موت وإطلع عالبحر، عاللادقية يعني 

▂▂▂▂▂

✿ مين أصعب .. حب من طرف واحد أو حب من طرفين انتهى بانفصال ؟

ممممم التنين صعبين.

 حب من طرف واحد صعب وخصوصي إذا الشخص بوجهك طول النهار هاد تعذيب
 وحب من طرفين ينتهي بإنفصال حرام يعني مابعرف كيف حطيتن بنفس الميزان

▂▂▂▂▂

✿ بتموني ع دمعتك ؟

مو ديما حسب السبب وطبعا مابنتبه إذا في عالم ولا ﻷ بس إتدايق كتير ببكي وين ماكان مع إنو بحاول قدر الإمكان مانزلا لإنو برأيي الدمعة ضعف وانا مابحب يشوفني حدا ضعيفة

▂▂▂▂▂

✿ شو الشي اللي ممكن يخلي عين مرام تذرف دمعة ؟

حدا يطعني بضهري ويحكي علي من ورايي ويكون ظلم ويحكم علي لمجرد إنو سمع شي
وإمي، وطبعا إمي هاد السبب الأول

▂▂▂▂▂

✿ شو هو العيب اللي بتتمني تتخلصي منه بشخصيتك ، بالمقابل شو هو الشي اللي انتي فخورة أنه موجود بشخصيتك ؟


العيب بصراحة انا احيانا بكون لئيمة وبس إلتئم ماعاد بنتبه لحالي وبس عصب بروح الصالح مع الطارح وبزعل ناس مالن ذنب بشي وهالقصة بكرها كتير

الشي اللي بحبو بحالي هو إني طيبة كتير وعفوية وبحكي دغري شو ماكان السبب

صح وبكره بحالي شغلة إنو بس كون منفعلة بحكي بسرعة الف وبس روق بقول انا حكيت كتير كإنو، بس بكونو انجلطو اللي قاعدين :D

▂▂▂▂▂

✿ مين هو بيت سرك ؟

أمي ، بعدها اختي وطبعاً أنا 

▂▂▂▂▂

✿ شو هو أول شي بيجذب نظرك بشخص تعرفتي عليه جديد ؟

الشب شغلتين اناقتو وساعتو والشي تاني شخصيتو وطريقة حكيو

البنت صوتا لإنو بكره الصوت العالي للبنت وبتنزل من عيني دغري واناقتا وخجلا

▂▂▂▂▂

✿ حكمتك بالحياة ؟

ههههه انا كل يوم باخد حكمة صعبة اعطيك حكمة وحدة، اهم شي لاتعطي قبل ماتاخد ولاتوثق بحدا ،حب حالك قبل كلشي، ههههه ياخي كلني حكم انا.. ولحتى توصل لازم تتعب.

▂▂▂▂▂

✿ كيفك مع الأغاني ؟ عربي ولا أجنبي ؟ ومين أفضل مطرب ؟

مافي حدا محدد حسب مزاجي بسمع بس اهم شي يكون مافي مياعة وشي مو مفهوم، وبفضل القديم اكتر من الجديد.









✿ السهر × النوم بكير

النوم حبيبي

▂▂▂▂▂

✿ الحب × المال

ولا وحدة .. بس إذا لازم فضّل، بفضل الحب

▂▂▂▂▂

✿ الدجاج × اللحمة

الدجاج

▂▂▂▂▂

✿ خالة مرت أب × زوج أم ( مين أصعب )

أكيد زوج إم، تسترجي هيي تتزوج أصلاً

▂▂▂▂▂

✿ الواقع × الحلم

اكيد الواقع لإنو اللي بيحلم بالآخر بياكل كم، عيش الواقع شو ماكان وحاول تحسن فيه

▂▂▂▂▂

✿ التفاؤل الكاذب × التشاؤم الصادق

لاهي ولاهي قول الحمدالله وخليها ع الله وعيش اللحظة
▂▂▂▂▂

✿ تحبي × تنحبي

التنتين حلو إنك تحب من قلبك وتلاقي حدا بحبك كمان، بس بفضل كون محبوبة

                   ✿ تعقيب : كيف ممكن تتعاملي مع شخص حبك وانتي ما حبيتيه ؟

بوصلو الفكرة دغري حتى مايعيش ع أمل وبحاول ماإجرحو بس اكيد مابعطي امل عشي، وبما أن القصد هو حب حقيقي، فأنا هون بفضل حب ما انحب، لأنه إذا حبني وما حبيته رح يتحول لكره


                    ✿ تعقيب : يعني بتفضلي تتعذبي ع أنه يتعذب ؟

إي طبعا وخصوصي إذا حدا بعرفو منيح، يعني هو شخص منيح هاد قصدي


▂▂▂▂▂

✿ سعد الفرطوسي × سامر الآغا ( علمياً )

الدكتور سعد

▂▂▂▂▂

✿ برشلونة × ريال مدريد

برشلونة

▂▂▂▂▂

✿ حمامي × مغربي

مغربي
▂▂▂▂▂

✿ كابتشينو × ميلو

حسب إذا الصبح بكير 3ب 1 وإذا المسا ميلوو









✿ محمد هيكل

شب محترم جدا وشاطر وبتحسو بحالو مابيتدخل بحدا ولا بيحكي عحدا واشفت من غير كل منيح وانشالله بحقق اللي ببالو

▂▂▂▂▂

✿ مظهر الجاسم

زكي وطيوب وبحالو بتحس احيانا عندو غموض حكيو قليل بيسمع اكتر مايحكي ورح يكون إنسان ناجح

▂▂▂▂▂

✿ ملهم نوفل

شخص محبوب روحو حلوة بحب الضحك والمزح كلشي بياخدو ببساطة وسياسي مابزعل حدا

▂▂▂▂▂

✿ زال خليل

شب موهوب بتحس إلو عالمو الخاص محترم واجتماعي بحدود

▂▂▂▂▂

✿ لورانس يونس

شب اجتماعي طيوب ومرح بحب الضحك بحاول يكون ديما ضحكة وبيشتغل عحالو ليوصل

▂▂▂▂▂

✿ نادين نعيم

بنت رائعة طيبة كتير اجتماعية بتحب المزح والضحك بسيطة كتير وبترتاح معها يعني مريحة ومحترمة جدا

▂▂▂▂▂

✿ لين نور الدين

الضحكة مابتفارق وجها بتمزح وبتضحك وكلشي عندا إلو وقتوو

▂▂▂▂▂

✿ مروة هنا

من اطيب البنات اللي شفتن بنت رايقة كتير ومحبوبة جدا والمكان الؤي بتكون فيه بتكون الضحكة موجودة ع وجوه الكل وبتعطي دبما طاقة إيجابية

▂▂▂▂▂

✿ ربى الجهماني

بنت طيبة وعندا حنية وفيك تعتمد عليها هيي واعية وعفوية بتصرفاتا ألله يوفقها يارب

▂▂▂▂▂

✿ ندى محمد

حبابة ومزاجية احيانا اللي بقلبا ع راس لسانا وبتحب المرح بتكره الكآبة

واخيرا كلمة للكل مو بس اللي ذكرتن الله يوفقن يارب وبحققلن اللي ببالن ويسعدن وشوفن اطباء ناجحين وسعيدين بحياتن جد كلن تركو بصمة عندي

.
.

بصراحة يُتوج نفسه ويستضيف .. الأب المُعلم ( د. سعد الفرطوسي ) .

.
.

مهما حاولت أن تصيغَ أنفسها ، لربما تكون أحرفُ اللغة الـ 28 غير كافية لإيجاد وصفٍ قد يليق بالمُعلم الأول والأب لطلاب الطُب البشري في الجامعة السورية الخاصة .

البروفيسور .. الطبيب .. العالم ، سمِّه ما شئت من هذه الأسماء .. فهو وحين يتعلق بهذا الأمر يُفضل الإبتعاد عن كل هذه المسميات مُجرداً اسمه من أي ألقابٍ في تواضعٍ يفتقده الكثيرون .

اليوم .. بصراحة ، يُتوج نفسه باستضافة الأستاذ العملاق د. سعد الفرطوسي الذي يحل ضيفاً ويفتح قلبه لطلاب الطب .. لنُشاهد ولو الشيء القليل من سعد الفرطوسي بعيداً عمَّا نعرف قدر الإمكان 

.
.

سـ : مرحبا فيك دكتور .. بإيجاز كيف ممكن تحكيلنا عن سعد الفرطوسي ؟


أنا د. سعد الفرطوسي ، وُلدت في بغداد سنة 1952 في منطقة قريبة على نهر دجلة اسمها العطيفية، لا زالت هذه المنطقة من أجمل مناطق بغداد .. درست الثانوية وبعد ذلك أثناء سفري وتوجهي لسويسرا مررت مرور عابر بدمشق وعلقت ( يضحك ) لـ 45 سنة فيها .


▃▃▃▃▃▃


سـ : دمشق أم بغداد ؟


طبعاً هذا سؤال مُحرج .. لأنَّه لا يمكن أن أجيبك سوى ببغداد ، في النهاية هو الوطن وهو الطفولة .. هو العشق الأول والعشق الأول مهم ، بغداد ثم بغداد .. تبقى أولاً وثانياً وأخيراً .


▃▃▃▃▃▃


سـ : إيمتا طلعت من بغداد ؟


طلعت سنة الـ 1970 من بغداد وترددت عليها لسنتين 3 .. ثم انقطعت عنها 30 عام ثم عدت إليها بعد هذه الفترة ، كانت العودة مشابهة لعودة أهل الكهف للمدينة ، المدينة تغيرت والشوارع تغيرت والعملة تغيرت .. حتى بيتي تغير والمنطقة تغيرت لدرجة اضطريت أسأل وين بيتنا فدلوني الناس .. كنت عابر للبيت فدلوني وقالولي ارجع لورا ، لما رجعت .. لقيت أنَّ بيتنا صار ثالث بيت بعد ما كان الثاني بسبب تعمير بيت بالقرب منا ، ميزت بيتنا من النخل .. البناء لم يكن مميزاً بقدر ما كان النخل هو المميز لبيتنا .

هذا شيء مهم .. أنه بعد كل هالعمر بقي النخيل هو اللي يميز بيتنا وفعلاً بغداد والحياة العراقية أهل لأن تكون مميزة بالنخيل ، والنخيل معروف أنَّه مأمورين بأن نذكر عمتنا النخلة ، لأنها خلقت من فضلة طينة آدم وهي تختلف عن النباتات الأخرى .


▃▃▃▃▃▃


سـ : طلعت من بغداد كرمال الدراسة ؟


أنا طلعت كنت رايح إلى سويسرا حتى أدرس ويُفترض أن أقضي فترة 6 أشهر قبل أن ألتحق بالجامعة، هذه الأشهر كانت في دمشق .



▃▃▃▃▃▃





سـ : وشو اللي خلاك تبقى في دمشق بهالأشهر وغير رأيك .. هل وقعت في قصة حب ؟


أول شي كان عندي خال عايش بسويسرا ومتزوج سويسرية ، فأمي كانت تقول ما بدي ابني يروح ع سويسرا وياخذ  فرنجية - أجنبية ( يضحك ) ، فلما أنا سجلت في دمشق أمي فرحت كثير وقالت اي احسن لك من سويسرا أحسن ما تصير مثل أخوي وما ترجع لنا ، بالأخير ما رحت ع سويسرا بس كمان ما رجعتلهم .


▃▃▃▃▃▃


سـ : بسوريا ، التحقت بكلية الطب مباشرة ؟


فعلاً التحقت بكلية الطب .. وكنت متأخر يعني التحقت بشهر شباط ، ومع ذلك هذيك السنة نجحت فيها بالرغم من التأخير بالتسجيل .. نجحت بسبب أنَّه صار عندي نوع من التحدي ، يعني وإذا كان بالشهر الثاني ؟ هذا لا يعني أنه ما أنجح .. في البداية قلت لنفسي أنه خلاص هالسنة نقضيها عادي ونتعرف ع المدينة .. كانت الأمور كثير غريبة فطبيعة بغداد غير طبيعة الشام .. هناك تسكن بـ ( فيلا ) هُنا بالمقابل تسكن بشقق، الشقق عنا مذمومة .. تفاجأت بوجود قبو هُنا ( يضحك ) .. كان أمر غريب أشوف ناس تعيش بقبو فالأخير وكما كنا نقرأ في القصص .. كان مكان لتخزين النبيذ .

تغيرت عليي أشياء كثيرة .. ولكن الحمد لله المدينة كانت جميلة لا زالت جميلة لحد الآن .. أكبر دليل على ذلك هو أنَّه صحيح هوائي في بغداد لكن بالأخير حياتي هُنا .. النبي صلى الله عليه وسلم كان هواءه في مكة لكن سكن المدينة .


▃▃▃▃▃▃


سـ : دخلت الطب عن قناعة ؟

دون شك 


▃▃▃▃▃▃






سـ : السبب ؟ الناحية المادية .. البريستيج .. أم الرغبة في تقديم الخدمة ؟


هذه العبارة دائماً الواحد يقولها .. لا تنسى أنَّي أتحدث الآن بآخر مراحل ممارستي للطب .. والحمد لله لم تكن مادية وما يثبت هذا الشيء هو هذه المراحل الأخيرة وليست الأولى من حياتي ( يضحك ) .

الإنسان يبحث عن أمرين في حياته .. يبحث عن جاه وعن مال ، هلأ كثير من الناس تدخل الطب لأنَّه يحقق لها هالأمرين، دون شك في عدد كبير من الناس سيكون هذا مسعاهم ، أكون طبيب .. سمعة الطبيب كثير عالية وبنفس الوقت مدخول مادي فتتحق هالأمور .

فانت لما تدخل وتستطيع أنه تحور هالمفهوم من جاه ومال إلى حقيقةً خدمة .. هذه عملية الـ ( Turning - تحويل ) للمفهوم تحتاج لمجاهدة كبيرة .. نعم ادخل لأنَّك ترغب بالمال والجاه ولكن اسعَ لهذا التحويل وحولها لخدمة .. وأي خدمة ؟ الخدمة تكون سواءً لمريض أو حتى تجاه طالب .. أن تعلم طالب بإخلاص .

لا أخفيك، أنا قبل محاضرة أعطيكم إياها أتمتم بلساني أشياء أنتم لا تسمعوها، أشياء أحكيها بيني وبين نفسي .. هذا اللي أحكيه أمرين : الأول : أدعو الله أن يفتح أذهانكم وتفهموني .. الأمر الثاني : أدعو لجميع الحاضرين في محاضرتي بالتوفيق وهم لا يعرفون بذلك .. أقول ( ربي فهمهم ما أقول ووفقهم ) .. هذا الشيء أتمتم به قبل كل محاضرة .

لأنَّه أجعل مسيرتك التي بدأت بشيء ، ثم إذا ما كانت نية الخدمة غير حقيقية بهذا ستجعلها حقيقية .. وبالنسبة لي أعتبر هذه مجاهدة الطبيب تتمثل في أن تحرف المفهوم نحو الإتجاه الصادق والحقيقي .

أنا أعتبر جاهي هو طلابي .. اللي هم أكيد يحترموني ويحبوني وأنا كذلك أبادلهم نفس الشيء، وشخصياً أعتبرهم جزء من حسناتي، لأني أحاول أكون مخلص في تعليمي لهم وقد يتواجهوا في البداية بصورة يعتبرونها قاسية ، لكن أوكي .. أحياناً نحن وصغار نشوف آباءنا قاسيين لكن مع الوقت نكتشف أنَّهم كانوا يسعون لمصلحتنا .

مين وهو صغير فيكم نسي كم كان الحمام صعب لما يسحبوك ع الحمام لما تحممك أم ، الآن بعد وقت طويل اكتشفت أنَّ هذا الحمام اللي كان لك كابوس ، هو الشيء اللي لازم يصير .


▃▃▃▃▃▃


سـ : خلال سنوات الطب ، أي فترة أصعب العلوم الأساسية أم السريرية ؟


دون شك العلوم السريرية .. أولاً أنا شخصياً لأنَّ الدراسة كانت بالعربي وما أحبها، كنت دايماً أرفق فيها دراستي لأي مادة باللغة الإنجليزية فعملية أنَّك تدرس بشكلين كان عبء كبير .

ما أنسى خصوصاً لما يكون عندك هوايات أخرى لازم تمارسها إضافةً لدراستك الطبية .. وأنا شخصياً ما حرمت هالهوايات ، لما كنت صف أول وثاني ، سنة الـ 71 ألغوا الإعدادي فحطونا صف ثاني رأساً دون ما نطلع للأول وبهذا كانت سنتين في سنة ، أذكر في تلك السنة كان 28 من شهر 8 هو آخر يوم امتحانات .. أي كامل الصيف فكانت كثير سنة صعبة ومع ذلك نجحنا فيها .. وهذا يثبت لك أنَّ الإنسان إذا وُضعت عليه ضغوط قادر يتحملها .



▃▃▃▃▃▃


سـ : أثناء دراسة الطب في ست سنوات .. كيف كانت حياة دكتور سعد ؟ هل كانت محصورة بالدراسة ؟


كانت من أروع ما قضيت في حياتي، أولاً كنت مقسمها تقسيم جيد ، شيء للدراسة وشيء لأمور خارج الدراسة 
يعني كنت بالكاد في جلسة موسيقية بالمدينة ما أحضرها، كنت مشترك بنادي السينما اللي هو بسينما الكندي، بحيث كل يوم اثنين يقدموا فيلم وهُناك مناقشة .. كنت أحضر تقريباً كل الجلسات الأدبية بالمدينة بكل ما تحمله ( كل ) من معنى، ما أفوت أي جلسة .. بل كنت أحضر أيضاً محاضرات بجامعات أخرى في حال كان الأستاذ مميز .

لحد الآن ما أنسى ، بكلية الفلسفة كان في أستاذ اسمه أنطون مقدسي، من خيرة أساتذة الفلسفة توفى الله يرحمه وكان رئيس قسم الفلسفسة، كانت دايماً أجتهد لأحضر محاضراته بكلية الآداب .

أذكر كنت أحضر لأدونيس لما جاء لدمشق بعد الحرب الأهلية في لبنان .. كنت لا أفوت أي محاضرة له في كلية الآداب .

أتذكر بالسنة الثالثة سجلت في معهد الألسن لأتعلم اللغة الفرنسية .. ما كنت أفوت أي شيء .

ومع كل هذا .. ما كنت مقصر في الطب، كنت حس أني جاي مارس حياتي الإعتيادية ونحضر .

أنا أذكر لما اجا صبحي الوادي ( مؤسس الفرقة السمفونية السورية وبالمناسبة هو عراقي وتوفي مؤخراً قُبيل 4 سنوات ) .. كان عنده محاضرة في المركز الثقافي الألماني وكنت أنا حاضرها، فأثناء المحاضرة يعني صار في مداورات بيني وبينه في موضوع المحاضرة اللي أعطاها آنذاك عن الموسيقى ، فبعد ما انتهينا من الجلسة اجا قعد جنبي وقلي نحنا في صدد تأسيس الفرقة السمفونية السورية وأنا كثير بنبسط إذا بتشترك معنا .. فأنا تفاجأت وقلت له أنا لا أجيد العزف على أي آلة .. فهو فكر أنه أنا بعزف لكن عزفي رديء .. فقال لي هي بنظبطها ( يضحك ) .. فقلت له جد .. أنا ما مسكت أي آلة موسيقية بحياتي، فقال لي بمعنى الكلمة ؟ قلت له أبداً .. فقال لي : لكن هذا الحكي اللي كنت عم تحكيه ما يدل على ذلك، كنا نتناقش وقتها عن فن الفيوجا عند باخ، فقال لي أنَّ هذا الكلام ما يحكيه شخص ما بيعزف .. فقلت له اي نعم هذا أنا .. فكان متفاجئ ورجع لي مرة ثانية وقال لي ممكن نحل مشكلة العزف وأنا عم دور على عناصر تفهم بهالشغلة .

هذا المثال بس لتوضيح أني كنت متعمق بأمور غير الطب .. ومع ذلك ما كنت مقصر بالموضوع الطبي .. أنا بالسنة الخامسة أخذت ECFMG .. أي قبل التخرج مثل انتوا الآن كيف تاخذون USMLE قبل التخرج .. كان الإمتحان وقتها مرحلتين لكن بيوم واحد وأنا وقتها قدمتها بالأردن فلم يكن مركز بدمشق .

أنا حتى الآن تلك الفترة أشوفها رائعة، إضافةً لذلك كان عندي مطالعات ثانية ودروس في الفلسفة والآداب وحتى أتذكر في سنة الـ 1975 رحت بيروت عشان أسجل بكلوريس فلسفة، كان عندي كثير رغبة بهالفرع لكن لسوء الحظ .. في تلك الفترة لما رحت بيروت بدأت الحرب الأهلية وانحرمت أنا من هالموضوع، فأنا واقعياً تضررت من الحرب الأهلية بلبنان (يضحك) .. كان هلأ عندي بكلوريوس في الفلسفة .


▃▃▃▃▃▃






سـ : قرأت كتاب 1000 صفحة عن النيفيديبين ؟ هل هذا الطبيعي أم أنت استثنائي ؟


(يضحك) .. شوف قد يكون استثنائي، لكن شوف .. لا تقدم على شيء لا تجيده، وانت إذا كنت طبيب فلازم تجيد هالمهنة وهذه المهنة واسعة جداً .. إذا كنت تريد تكون طبيب متميز يجب أن تجيد ما تمارسه، هذا المبدأ اللي كنت ماشي عليه .

كلكم تعرفون الآن عندي هوايات زراعية، واللي هي ما كانت موجودة، متى صارت ؟ لما صار عندي حديقة واللي عمرها الآن 10 سنوات .. فلما بديت كان عندي تراكمات ثقافية حول الحديقة .. تراكمات أسرية ، لأنَّنا في بيتنا أساساً تربينا على حديقة وأزهار واعتناء فيها وهذا .. لكن هذا لا يكفي، لما دخلت في عالم الحديقة أصبحت أطلع ولا تنسى أنَّ وجود لغة ثانية عندك كثير يساعدك بهذا الأمر .. فدخلت لهذا الموضوع وصرت أطلع، فالآن ما أحط نبتة إلا وأنا أجيد كل حيثياتها .

فالقاعدة العامة : " لا تقدم على شيء حتى تُجيده " .. دون شك إجادة أي شيء يستحق جهد .. جهد عقلي ، بدني وكلهم تمارسهم .

بالنسبة للنيفيديبين، هذا دواء كنت أستخدمه .. الـ CCB لما نزلت يعني كانت مثل انفجار في عالم الطب القلبي .. كنت حس أنَّه لازم أكون ملم بهالشيء، وهذا الأمر تكرر معي أيضاً لما ACEi نزلت .. أذكر لما كنت أدرس في ليبيا وأتابع المرضى كنت أول من استعمل الـ ACEi في تلك المدينة بحيث كانوا المرضى يجيبون الدواء ويسألوني هذا اللي طلبته ؟ وبعدين أنا طلبته من وزارة الصحة أنه هذا الدواء استعمله .. هلأ هذا الدواء كان وقتها صار له 5 سنين نازل عالميا وما استخدمته وطلبته إلا لأني كنت مطلع عليه تماماً ..



▃▃▃▃▃▃



سـ : بعيداً عما قد يُقال من تصنيف حول ثقة وغرور .. بسلم من 1 إلى 10 .. كم تُقيم نفسك علمياً !؟


هلأ التقييم العلمي شوف .. أنا لا أعتبر نفسي إلا طالب مثلكم، كل ما في الأمر أنكم Young بينما أنا Old
أنا وإن وقفت لأدرسكم .. فأنا لا زلت طالب ، فتقييمي هو تقييم طالب ويجب أن تبقى طالب لآخر حياتك العلمية 
الطالب يحتاج دوماً لمن هو أعلى منه حتى يقيمه، الآخرون يقيموني .


▃▃▃▃▃▃



سـ : قصة التقييم تقودني لسؤال جديد .. حضرتك انتقدت كتاب ماكلاود في حضرة كاتبه دون علمٍ منك بأنَّه هو الكاتب، احكيلنا عن القصة ؟


اي هذه كانت سنة الـ 96 ، كنت أروح كفاحص خارجي في مدينة طرابلس وكان يجي دكتور " مونرو " اللي هو محرر لكتاب ماكلاود، ونلتقي كل 6 أشهر في لجنة امتحانية .. في إحدى المرات هو سألني انت ايش بتدرس ؟ قلت له قلبية فسألني عن الكتاب اللي مقرر عنا بالجامعة في بنغازي ( جامعة العرب الطبية ) .. فقلت له أنَّ الكتاب المقرر هو ماكلاود لكن أنا ما بدرس منه .

سألني عن السبب ؟ فجاوبته أني قريت شغلة بالقلبية شفتها مو صحيحة فقلت ما رح أدرسهم منه .. سألني شو هو اللي مو صحيح !؟ 
قلتله عن الـ Pulsus Alternans .. مكتوب النبض يكون Strong and weak .. قلي طيب شو الغلط بهاد ؟ قلتله Pulsus Alternans بيصير بقصور القلب وما في شي اسمه Strong pulse بقصور القلب .. في شي اسمه Weak and weaker .

فهو هون صفن وفاجأني .. وقلي اي صح كلامك مزبوط بس مو انا اللي كاتب هالشابتر، هذا الشابتر كاتبه كريستوفر فأنا هون تفاجأت وقلتله انت مونرو تبع ماكلاود ؟؟ 

وقتها طلب مني أني أسجل ملاحظاتي على الكتاب مقابل وضع اسمي على الكتاب .. بطبيعة الحال هذا ما حصل إلا لأني شخصياً أهتم كثير بالـ Basic Medicine اللي هي ( القصة والفحص السريري ) وأعتبره الفن الحقيقي في حياتي الطبية وأساس الطب .

جون مونرو إلى اليسار

ما بعرف بالأجيال القادمة هل ستبقى تعتني بهذا الأمر أم أنَّ التقنيات رح تغلب عليها، أنا ما جعلت التقنية تغلب عليي، اهتميت بالتقنية بشكل ما بقلك بصورة كاملة ، لكن ما تركت التقنية بس حافظت ع الأساسيات ومتابعها ومتابع حتى تاريخها وأعتبر نفسي أنَّه لكي تكون طبيب جيد لازم تتقن هالفن هذا .. فن القصة والفحص السريري .

كان عندي جلسة وقت كنت أشتغل ، كانت يوم ثلاثاء ، كنت أعنونها بـ " Cases i missed - حالات ما شخصتها " .. وهذا كان يثير غرابة الأطباء، أنَّه الناس تقدم حالات تتباهى باللي شخصتها، أنا كنت أقدم الحالات اللي ما شخصتها وكان أساس الجلسة لما أقدم الحالة هو ذكري أنه ليش أنا ما شخصتها ؟ راح أرجع للحالة وأشوف اني ما شخصتها مو لأني مو قاري آخر مقالة بالمجلات الطبية العالمية .. بل لأني ما أخذت قصة وفحص سريري جيد .


▃▃▃▃▃▃




سـ : بالفعل أذكر مرة كتبت على صفحتك الشخصية :" إذا فاتك تشخيص ، لا تظن أنَّ هذا بسبب نقص معلوماتك النظرية بل لأنَّ لديك خلل في أخذك لقصة المريض أو فحصك السريري له ".


بالضبط وهذا شفته بكل ممارسة الحياة هيك .. هلأ ليش الواحد قصر ؟ لأنَّه مشوش .. ما عنده وقت ويُطلب منه أنه يشوف عدد كبير وهذا كان ولا يزال أحد الإشكاليات الكبيرة اللي بيعاني منها الأطباء .. وهذا أنا عانيت مع هالأمر فأنا ما بقدر أشوف في العيادة الحكومية اللي عملت فيها أكثر من 15 مريض باليوم .. في عدد كبير بيجي وكنت أعاني من هالموضوع وتجي الواسطات ومدري ايش لكن أنا فعلاً ما عندي قدرة على أكثر من 15 مريض .. ليش ؟ لأني ما أستطيع أشغل فكري بعد هالـ 15 حالة بالمقابل أعطي لكل واحد من اللي أشوفهم حقه التام في القصة والفحص وكنت أشخص حالات من خلال الفحص والقصة .. مثلاً كنت أعرف مريض قصور قلب غير معاوض من خلال قصته لأني أعرف أنَّ هذا المريض هلأ رح يقلب العنب تبعه وبالتالي جهد إضافي وتعرق زائد وإرهاق وبالتالي انكسار معاوضة .

لذلك حتى تكون طبيب جيد .. ركز على هذيْن الأمرين .. أنت تشخص لأنَّك تأخذ قصة وتقوم بفحص ممتازيْن ولا تُشخص لأنَّك تقوم باستقصاءات .. انت لاحظ بالممارسات اليومية يجوني طلاب يورجوني X-ray أو شوف لي هالتحليل .. والدك وينه ؟ بالكويت أو بالسعودية .

هذا نوع من الممارسات مخرش وأنا المفروض ما أزعل الطالب ، لأنه بيفكر إذا رفضت أنَّه من باب عدم رغبتي بالتعاون، لكن الواقع هو أنَّ المريض ليس ورقة تحليل أو صورة شعاعية مرسلك عبر الوسائل الإجتماعية واعرضه على هذا الدكتور .

وأحياناً تعطي رأي يطلع غلط وتطلع انت بالنهاية ما تفهم ( يضحك ) .. لكن بالنهاية هذه ممارسة غير صحيحة .

▃▃▃▃▃▃



سـ : بعد الطب بسوريا .. وين تنقلت بحثاً عن العلم ؟


أنا تنقلت بمسافات كثيرة .. رحت للخليج وعشت فترة ورحت لبريطانيا ثم عدت إلى سوريا وكان عندي إعاقة في ذلك الوقت وهو جواز سفري .. النظام في العراق كان قاسي والحصول على جواز سفر آنذاك كان كثير صعب وهذا كثير أعاق من تحركاتي في حياتي وبالأخير بقيت في بلد ما كنت أتوقع أني أعيش فيه وكثير ناس تشوفه ليس بلداً بل منفى .. اللي هو كان في ليبيا وعشت فيها 17 سنة واللي أخذت عصارة نتاجي الحياتية لكن الحمد لله عندي أطباء تخرجوا من هناك ودرستهم ولحد الآن هناك تواصل معي .

كنت مرتاح لهالناحية .. صحيح كنت بعيد والبلد ليس من السهل العيش فيه والنظام القبلي الصعب هُناك ثم الحصار والتنقل الصعب منه وإليه، فمثلاً كنت أحتاج أتنقل مسافة 1700 كم لأستقل طائرة تأخذني لسوريا أو عمان .

وبالأخير الأولاد كبروا واجيت الى سوريا وما كان عندي رغبة بأني اروح للعراق .. بحثت عن الإستقرار بجنب الأولاد قبل أن تبدأ مسيرتي مع هذه الجامعة .







سـ كيف انضميت للجامعة !؟



أنا كان معروض عليي الإنضمام لها لسنتين وما داومت، كان دكتور عبد المجيد السعدون الله يذكره بالخير رئيس الجامعة يبعث ورايي وأقول له مشغول .. هذا الأمر استمر سنتين .

فهو سأل صديق مُشترك وصار حوار بينهم ..

د. عبد المجيد السعدون : د. سعد بشو مشغول ؟
الصديق المُشترك : د. سعد ما عنده شي .. ما مشغول بشي
د. عبد المجيد السعدون : بس انا قلت له مرتين يجي وقال لي مشغول بشي ضروري بس أخلص منه بجي
الصديق المُشترك : د. سعد مشغول بحديقته ما عنده شي غيرها ( يضحك د. سعد ) .
د. عبد المجيد السعدون : معقولة ؟؟
الصديق المُشترك : اي نعم .. ما عنده غير الحديقة 

فالدكتور عبد المجيد بعدها اجتمع فيني بمطعم وحكالي القصة وقلي بالأخير طلعت مشغول بالحديقة ( يضحك ) .. وبعدها تناقشنا وتوفقنا .


▃▃▃▃▃▃



سـ : شو هي الشهادات العلمية اللي حصلت عليها ؟


هلأ أنا حقيقةً بسبب الأوضاع في بريطانيا ما استطعت الحصول على العضوية رغم أني قدمت الجزء الأول لكن بعدها للظروف خرجت وما كملت وبهذا امتنعت عن تقديمه، وما كان في ذلك الوقت مكان آخر غير بريطانيا عشان أقدم فيه وكنت جاهز فعلياً لأقدم الجزء الثاني .

اجيت هون لسوريا .. عملت شهادة الإختصاص السورية مرتين مرة في الطب الباطني والثانية في القلبية .


▃▃▃▃▃▃


سـ : تحكيلنا شوي عن عائلتك الكريمة .. كم ولد عندك ؟



أنا أب لخمس أولاد .. 
الكبيرة : دكتورة تعمل الآن في عمان .. اختصاصية باطنة
الثاني : طبيب أسنان هو الآن يعيش في ألمانيا .. درس وتخرج هُناك وفتح عيادة هُناك وهو جيد الحمد لله
الثالثة : بنت تختص الآن ماجستير هندسة كمبيوتر في ألمانيا
الرابعة : طبيبة أسنان تعمل ماجستير الآن في جامعة دمشق
الأخير أحمد : سنة أخيرة صيدلة 

عنا جهاز طبي مؤلف من 2 أطباء أسنان وطبيبة بشرية و صيدلي إضافةً لمهندسة


▃▃▃▃▃▃






سـ : مُزارعٌ أهوى الطب .. احكيلنا عن قصة هالعبارة الشهيرة لك ؟


( يضحك ) .. هو تعرف احنا بلغنا فترة من العمر .. وهذا يذكرني بوالدي بعد ما تعاقد، عندنا حديقة فكان يبذل وقت أكبر بالحديقة وشفته كنت مرتاح أكثر .. فبعد ما صار عندي حديقة تشكل عندي نوع من التحدي أني لازم أخليها أحلى من حديقة بيتنا .. طبعاً ما حسنت أسوي هالشي، لا زالت حديقة بيتنا في بغداد واللي يشرف عليها أخي أجمل .. هي خبرة متراكمة عن أبي بالرغم من أنَّ والدي رجل حقوقي وليس فلاح لكن كانت عنده اهتمامات زراعية .

حديقتي فيها تنوعات جميلة .. ومين ما اجا ينبهر فيها ، فيها ثقافة حديقة وبعد فترة 8 سنوات حولتها لمهنية أكثر وعلمية أكثر وطبعاً هذا متحقق لأن الآن عبر النت تأخذ المعلومات اللي تريدها عن أي نبتة .

من حسن حظي أنَّ زوجتي هي أيضاً حابة هالهواية بل وتشتغل بالحديقة أكثر مني، لكن هي ما عندها إطلاع ع النت مثلي فتسألني في بعض الأمور هي شو وهي شو .. لكن في بعض الأحيان هي تختار الأمور بحسب النظرة الفطرية .. فأنا بصفن وبعدها بقلها تمام إذا نجحت فانتي الصح واذا ما نجحت نرجع للناحية العلمية .

حديقة بغداد

▃▃▃▃▃▃



سـ : زوجة حضرتك دمشقية ؟ 


اي نعم .. وهي صيدلانية




سـ : هل هي السر وراء جملتك " عشقي دمشقي ". ؟



طبعاً مرة نزلت بيت شعر بهالشي للشاعر " أحمد صافي " العراقي الذي عاش في دمشق ويعرفه شعراء دمشق في الخمسينات والستينات وهو فيلسوف أكثر منه شاعر، كان يتردد على مقهى الهافانا .. من جملة اللطائف اللي صارت له أنَّه مرة من المرات غير جلسته لمقهى آخر، فراح له صاحب المقهى وهو يبكي قله أستاذ الله يخليك المقهى رح تفلس .. الناس كانت تجي لوجودك فارجع فـ شايك وشاي ضيوفك عليي بس ارجع .

واشتهرت مقهى الهافانا بهذا الشاعر اللي هواه دمشقي .. فهو قضى آخر فترة في حياته بدمشق ثم ذهب للبنان في فترة الحرب الأهلية وأُصيب بجرح في صدره آنذاك ودخل المشفى ثم نُقل للعراق وهُناك توفي .

أحمد صافي هذا الشاعر هو أحد الأدباء الذين ترجموا رباعيات الخيام، ومعروفة رباعيات الخيام ترجمها أيضاً أحمد رامي اللي هي غنتها فيروز .. أحمد رامي هذا الشاعر المصري المشهور لما ترجم رباعيات الخيام ما كان مطلع على ترجمة أحمد الصافي .

فيما بعد جابوله الترجمة وقالوله اطلع على ترجمة هذا الرجل .. فلما قرأ ترجمة أحمد الصافي ، قال أحمد رامي :" هذا هو الأصل .. والخيام هو من ترجمها ".. جملة تدلك على أنَّ ترجمة الصافي كانت أقوى من النص الأصلي وتدلك على شاعرية أحمد الصافي رحمه الله والذي توفي في السبعينات وأظن 77 .

كان يعشق دمشق ورجل فقير .. انا لما اجيت لدمشق كان هو موجود فلما كنت مر من أمام مقهى الهافانا كنت أشوفه ، كان يمتلك الأدب العراقي في أجواء الياسمين الشامي .. أتصور هذا بيكون أجمل إبداع .


▃▃▃▃▃▃








سـ : بعد سوريا ومحطة بنغازي .. دكتور سعد رجع لسوريا مُجدداً لكن لم يعمل كطبيب بل كُمعلم ، خيار أم ظروف ؟

ليس خياراً للأسف الشديد .. القانون السوري منع من ذلك


▃▃▃▃▃▃


سـ : بالرغم من أنَّك خريج سوريا ؟

نعم ، بالرغم من ذلك، وهذا وفق قانون في 2006 يمنع العراقيين من العمل في المجال الطبي في سوريا .. راجعت وزارة العمل والشؤون الاجتماعية والجواب كان ممنوع إلا في حال كان لديك تسجيل قبل 10 سنوات من هذا القانون .. وهو قانون غريب وأعتبره مو حقيقي .. لكن بطبيعة الحال هذا ليس أول حقٍ غُصبناه .


▃▃▃▃▃▃


سـ : هل منحك التعليم متعة مُساوية للعمل كطبيب ؟


هلأ ما فيك تفصل بيناتهن، كنت أتمنى أني أمارس وحتى كل اللي ادرسهن كانوا يسألون ليش هذا ما يدرس رغم كل اللي يقوله من علم ؟ في الواقع أنا محروم من ذلك والمرضى محرومين من ذلك أيضاً .. لكن هذا هو القانون واحنا أحياناً ندفع الثمن وغيرنا يدفع الثمن .


▃▃▃▃▃▃


سـ : اجتك عروض من الخارج للعمل ؟


لحد الآن تجيني عروض ، من الخليج ومن العراق أكثر وحتى أثناء زياراتي دُعيت لوزارة الصحة في بغداد بشكل رسمي وقابلت وزير الصحة اللي كان متحمس لأني أكون في بغداد ولكن كان الرد صريح بأني مرتاح هنا في دمشق .


▃▃▃▃▃▃


سـ : انعرضت عليك بعض المناصب السياسية في العراق ورفضتها .. ما السبب !؟


نعم ، ووضعت لها شروط قاسية مثل ما بيقول المثل ( اللي ما بده يزوج بنته، يغلي مهرها ) ( يضحك )، مناصب عالية في الواقع وكانوا يتصلوا علي دوماً لكن الآن توفقوا من فترة، قطعوا الأمل لكن هذا الموضوع حدث وأنا حطيت شروط معينة كانت بالنسبة لهم شبه تعجيزية .

كان عندي أصدقاء، د. المشهداني وهو رئيس البرلمان، جاء إلى دمشق في 2008 وأعطاني ورقة بيضاء موقعة وقال لي اكتب فيها ما تشاء وكان إحراج شديد لي .. كان أكثر شخص أحرجني وهو أيضاً صديق عزيز .

هو صارت له مشكلة معروفة آنذاك وعلى ضوءها قدم استقالته من البرلمان، فأنا شفته وقت الإستقالة .. فأنا قلت له شرطي الوحيد هالمرة وهو أن يسحب الإستقالة (يضحك) وكنت عارف أنَّه ما رح يقبل الإستقالة .


▃▃▃▃▃▃


سـ : سعيد برفضك لهذه المناصب ؟


اي نعم سعيد، لأني أعرف لو دخلت لهذا العالم وهو عالم السياسة، فهو عالم متعب والحمد لله استطعت أن أنجو من شراكه .


▃▃▃▃▃▃


سـ : أحد الأطباء اللي مروا في مسيرتك كان يتحداك .. وبالنهاية كان هو الخاسر، تحكيلنا القصة ؟


تتواجه أحياناً بحياتك بناس عندهم اعتزاز بأنفسهم، وأنا بواقع الحال أحاول ما اصطدم مع هؤلاء، نعم إذا كان ممارستك ستؤثر على حياة مريض فأنا سأتدخل، ليس لأن أثبت لك أني أفهم منك بل لأجل المريض .. وهالمواقف صارت معي أكثر من مرة.. أحاول أصبر على هؤلاء ولما أتدخل ما أقصد إساءة له أو تحجيم ، لكن لمصلحة المريض قبل كل شيء.


▃▃▃▃▃▃



سـ : د. سعد .. أثناء فترة دراستك وشبابك من كان بيت سرَّك، لمن كُنت تبوح ؟



شيء جميل هالسؤال .. سأخبرك هذا الشيء، بيت سري هو ( مخدتي )، لو في جهاز يوم من الأيام يستطيع أن يكشف ما أودعته فيها راح يكون مسلسل طويل جداً .. قسم منه حقيقي وآخر خيالي ولا زالت المخدة حتى الآن هي بيت سري .


▃▃▃▃▃▃

سـ : حققت أحلامك اللي كانت راسمها لنفسك ؟


من دون شك، أنا حاولت أن أسير حياتي بشكل يكون فيها مرضاة ربي، في نقاط محورية في حياتي تحقق فيها هذا الشيء وأنا جداً مرتاح لهذا الأمر .

في شي اسمه ارتياح وفي شي اسمه رضا، أكيد ما حدا رح يرضى عن حاله، لكن أنا مرتاح لأني سويت أمور محورية في حياتي، كنت جداً مرتاح فيها الحمد لله .. شو هنن ما رح احكيهن، لكن مثل هاللحظات قد تكلفك شد عائلي أو مشكلة ما لكن الحمد لله بالأخير كانت دوماً نهايتها جيدة .


▃▃▃▃▃▃




سـ : لو طُلب من د. سعد اختيار اسم طالب في مسيرته التعليمية لا ينسى اسمه .. من سيكون ؟



هلأ شوف .. ما مهم الإسم، الطالب بيهمه اسم الأستاذ بينما الأستاذ بيهمه نوع الطالب، في طلاب عندي وسأضرب لك مثال.
الطالب المُجد عندي هو اللي تصير في علاقة سريعة بيني وبينه، في عندي طلاب كنت أدرسهم كنت أحبهم بشكل لأنهم كانوا مُجدين .

هلأ الطالب إذا كان مُجد وبنفس الوقت يتمتع بأخلاق عالية فهذا هو التكامل .. هذا يتحول من طالب إلى صديق بواقع الحال وهم إلى حد الآن يتواصلون معي ولما يكتبون لي رسائل يكتبون الوالد المُحترم ما يخاطبوني بصيغة أستاذ، يكتبون ولدكم .. ما يكتبون دكتور فلان .

الآن اثنين من الطلاب وأعلام في أحد المشافي في قطر ويكتبون بهذه الطريقة وهذا يدل على العلاقة الطيبة اللي ممكن تصير بيني وبين الطالب المُجد .

كان عندي طالب، في كل استدعاء لي للمشفى ليلاً كنت أشوفه، كان طالب سنة رابعة وحتى لو استدعيت في يوم تالي كنت أشوفه وهذا كان نظامه في سنة رابعة وخامسة، فلما تخرج كان الأول .. في ضمن اللوائح شهرين قبل أن يلتحق الطالب بسنته السادسة تدريبياً، هذا الطالب اجا لي وطلب مني اتدخل عند العميد وأستعجله بهذيْن الشهريْن بحيث يلتحق قبل بوقت ويستغل هالشهريْن .

أنا قلت له أنَّك الآن خارج من امتحان نهائي وتعبان وتخرج .. روح ارتاح وصيع واشرب عصير عند ابو شاكر :D، غير جو !
فقال لي عبارة مستحيل أنساها : دكتور أنا الإمتحان كان أسهل شي عندي لأني تعبت خلال هالسنتين فالإمتحان كان بالنسبة لي نزهة، والآن أنا مرتاح جداً فالراحة أخذتها أثناء الإمتحان .

الآن الطلاب أصعب وقت عندهم الإمتحان، عكس هذا الطالب تماماً .. وخلي في بالك هالشيء
" ما أدركته لم يكن ليفوتك = ما أدركته في الإمتحان لا يمكن يفوتك لأنك محضر
" وما فاتك لم تكن لتدركه = واللي رح يفوتك في الإمتحان لا يمكن تدركه لأنك مو محضره ".

فأنت بمقدار ما تُدرك رح يكون الإمتحان سهل عليك .. فأنا صفنت مع هذا الطالب وجملته .. هذا الطالب كان بالنسبة لي النوعية المُجدة .

انت تسألني عن اسم .. وبالواقع ما رح أعطي اسماء فكل الطلاب واحد، وبالنهاية كما قلت الطالب المُجد مع الأخلاق العالية هو الأول بالنسبة لي .. أما الطالب المُجد بدون أخلاق فهذا ليس بطالب، هذا مُتعب والحمد لله ما شفت من هالنوعية .

كل الطلاب اللي شفتهم آكلين على سفرة أبوهم وأمهم ومسميين قبل الأكل، وهذا شيء مهم أن تسمي على الأكل قبل الطعام أمام أمك وأبوك .. خليه يسمع تسميتك لأنَّه رح يرتاح ويعرف أنَّ ابنه صار .. كل شيء لا تسمي عليه فهو أبتر .


▃▃▃▃▃▃



سـ : الدفعات اللي درستها في الجامعة .. شو بتقدر تذكرنا بدفعة معينة ؟



دفعة قبل سنتين تخرجت، كانوا يسهروني للساعة وحدة، كانوا يحلوا أسئلة وطلبوا مني أتابعهم بحل الأسئلة ضمن مجموعة خاصة بهم، كنت أكتفي بالمتابعة وما أتدخل إلا لما يصير في عندهم مطب وما عرفوا يجاوبوا، في واحد منهم طبعاً يكون جاوب جواب صحيح .

فهم لما يوقفوا ينادولي انه فضلاً دكتور سعد .. فأنا بقولهم :" في تعليق حطيت عليه لايك ، دوروا عليه " (يضحك) .. فيبتدوا يرجعوا بتعليقات كثيييرة .. طبعاً لما سهروني للساعة وحدة فهذا يعني عندهم اهتمام .

في أحد الطلاب منهم كان الكيبورد ما عنده عربي فكان يكتب إنجليزي معرب، اللي هو قصي رشيد، هذا ما كنت أفهم عليه فأدخل وأقول لهم ترجموا لي ما يقول (يضحك) .. هو حالياً بالسويد وكان طالب لطيف .


▃▃▃▃▃▃



سـ : ورأيك بدفعتنا ؟

الرأي بدفعتنا سيكون بعد التخرج (يضحك) .. الرأي انتم تولدوه وليس أنا .. الطفل هو اللي بيحبب والديه فيه، لما يطلعوا فيه يبتسم لهم فانتم الآن ابتسموا لنا لأن لحد الآن ما ابتسمتوا لنا، الإبتسامة رح تكون بنتائج الإمتحان .


▃▃▃



سـ : هل من نصيحة لطلاب الطب ؟


نصيحتي لكم .. اقروا كتب طبية كتير، لكن لا تنسى، بنفس المقدار الذي تقرأ فيه الطب .. لازم تقرأ فيه القرآن لأنَّ هو اللي رح يوفقك في الطب .. لا تبتعدوا عن هذا الربيع وإلَّا ستكونوا في شتاء .. وإن كنت في شتاء عقلي فطبك سيكون شتاء عقلي .. هما في ارتباط .

دوماً انطلقوا من ربيع القلوب اللي هو القرآن .. وهو أساس كل شيء .


▃▃▃


سـ : كلمة الختام ؟


أدعو لكم بالتوفيق والتوفيق الدائم وأن تحافظوا دائماً في كل حياتكم على التكليف .. أنت مكلف والتكليف تشريف، مُكلف بأن تُمارس الطب، فمارسه كتكليف وليس كجاه ومال .. إذا نظرت لهذا الموضوع بهالشكل .. أنت هُنا كأنك أمام تكليف شرعي وهو تشريف .

الأستاذ لما يطلب من طالب خذ هذا الدفتر للإدارة، الطالب يفرح أنَّ الدكتور اختاره من بين الكل عشان يوصل الدفتر، أو كما في حالة امسح اللوح .. يرى فيه تشريف وهكذا العلم .. وبإذن الله رح تتوفقوا إن شاء الله .



.
.

الدكتور مدرس الرياضيات [ تان تان ] .. لماذا اختار الطب ؟ والمزيد في ( بصراحة )

.
.

يصفه البعض بالأنيق في اختياره للملابس .. وفي الواقع يغلب عليه أيضاً الأناقة في تعامله مع زملائه في الكلية .

ناجحٌ علمياً .. ومُهذبٌ في أخلاقه .. ومن الصعب أن لا ترتسم البسمة على مُحياك بتواجده .

( الإنسان اللي مهما أكل وحش .. ما بيسمن ) ، خبير الرقص الشرقي .. مظهر الجاسم أو كما يُلقب ( تان تان ) ضيف الحلقة الثامنة من بصراحة .. يفتح قلبه ويجيب على الأسئلة .

يروي تجربته مع تدريس البنات ، إعراب الحب في حياته .. ومن أين جاء لقب تان تان ؟ والمزيد في هذه المقابلة . 










✿ سـ : مرحبا مظهر .. اذا قلتلك احكي عن مظهر بسطرين ، شو رح تقول ؟

مظهر دعية الجاسم .. مواليد 91 .. أخ لـ 9 إخوة شباب و 10 بنات ، من دير الزور .. سوري الجنسية والإنتماء

▂▂▂▂

✿ سـ : لو ما دخلت كلية الطب شو كنت رح تدخل ؟

رياضيات

▂▂▂▂

✿ سـ : أديش علامتك بالرياضيات في المدرسة ؟

56 .. بس طبعاً بعد الإمتحان انصدمت اني تارك سؤال كامل عليه 4 علامات ما كنت منتبه له :(

▂▂▂▂

✿ سـ : أديش معدلك بالبكلوريا ؟

233

▂▂▂▂

✿ سـ : كيف كانت ظروف دخولك لكلية الطب ؟


من أيام المدرسة كانت بيجذبني كتير فكرة دكتور .. ومكانته الإجتماعية

▂▂▂▂

✿ سـ : احكيلنا شوي عن عائلتك .. ترتيبك بين إخوانك ؟

هلأ أنا الرابع من بين الإخوة الذكور من أمي .. أما لخالتي مرت أبي فأنا ترتيبي السابع
عيلتي منهم شي متغرب بالخليج ومنهم مقيمين بالدير

▂▂▂▂

✿ سـ : ما إعراب الحب في حياة مظهر الجاسم ؟

تباً .. سؤال صعب يخرب بيته ، بس ما بظن في أحلى من أنه تلاقي شخص يلتفت له قلبك ويكون النص التاني الك

▂▂▂▂

✿ سـ : عشت تجربة سابقة ؟ وهل ندمان عليها أم لا ؟


عشت .. وبالنسبة للندم، ساعات بندم وساعات بقول كان لازم عيش متل هالتجربة لاتعلم .. الحياة بدون تجارب ما بتعلمك

▂▂▂▂

✿ سـ : ممكن تعيدها ؟

اي بعيدها

▂▂▂▂

✿ سـ : ميين من صحابك بالجامعة بتحس انه ممكن يفهمك من غير ما تحكي ؟

ممكن أحمد أبوقورة بظن .. وصياحو بتوقع كمان

▂▂▂▂

✿ مين برأيك أفضل 5 طلاب علمياً بالدفعة ؟

من غير ترتيب : أحمد صياح، وكاع، هيكل، جمال و لين ( CMDS ) ومؤخراً .. انضم الهم الطيبي وصعب ما حط زهير معهم

▂▂▂▂

✿ مظهر ست سنتين بكلية الطب .. مين أكتر دكتور حببك بالطب ؟

أول شي سبع سنين بالأحرى مع الوقفة :)
من داخل الكلية : سهام سليمان
من المشفى + خارج الكلية : فرطوسي ( مع أنه لما تاخذ محاضرة معه بتتحسر ع ست سنين ما تعلمت فيها غير نقطة من بحر العلم ) و مغربي وسامر الآغا

▂▂▂▂

✿ مين من صحابك بالجامعة، بتعرف أنَّه اذا حكيتله سر فهو بئر لا يبوح ؟

أبوقورة وصياح ومرام

▂▂▂▂

✿ بدك تطلع مشوار لتنبسط ولازم تطلع فقط مع زميل واحد بالكلية .. مين رح تختار ؟

بختار حالي .. وإذا كان ولا بُدَّ بقول احمد ابوقورة ( لأن أحمد آكل عصي متلي .. ما رح يقعد يعدها )

▂▂▂▂

✿ مع الخطوبة والزواج لطالب الطب في أثناء الدراسة .. وعلل إجابتك ؟

الخطوبة ممكن ومع هيك حط خطين تحت الفكرة .. لكن الزواج أكيد لا هلأ
الفكرة كلها إني بحس انه الوقت مو مناسب .. بالنهاية في شغلات مهمة وفي شغلات أهم وبالنسبة لي نحنا بفترة الأهم حالياً اللي هي الدراسة وبس تخلص ممكن نلتفت للمهم اللي هي فكرة الارتباط

▂▂▂▂

✿ أقرب 3 طلاب لك في الدفعة ؟

أبوقورة ، صياح ، مرام

▂▂▂▂

✿ مين بتنقذ منهم إذا كنت بسفينة رح تغرق ؟

مرام .. بما انه البلد الشباب عم يروحوا ويروحوا فخلي هالاتنين كمان :D

▂▂▂▂

✿  كيف ممكن تتعامل مع قصة حب من طرف واحد بحيث البنت بتحبك وهي جداً محترمة لكن قلبك ما مال لها ؟

هلأ إذا محترمة فعلاً .. ما رح خلي الكلمة أول شي لقلبي ، رح خليها لعقلي مبدئياً واحتك فيها أكثر ممكن بعدها يميل قلبي الها

▂▂▂▂

✿ نحنا بزمن صعب ما يكون في اختلاط .. لكن لأي مدى ممكن توافق ع فكرة صداقات بين شباب وبنات ؟

متل ما قلت نحنا بزمن صعب ما يكون في اختلاط، انفرضت علينا الفكرة فرض وصعب .. بالنسبة لفكرة الصداقة اللي عم تحكي عنها ممكن تكون مقبولة اذا كانت ضمن إطار الإحترام ومجرد صداقة عادية ، لكن للأسف بوضعنا هالأيام أغلب الصداقات طلعت كتير عن هالإطار .. وبالنهاية نحنا بمجتمع شرقي بيرفض هالشغلات تماماً

▂▂▂▂

✿  في صفة بيقولوها البعض عنك بتسعدك ؟

الأناقة :D

▂▂▂▂

✿  في صفة سلبية بشخصيتك بتتمنى تتخلص منها .. إذا اي شو هي ؟

ممكن اني بهتم بناس أو شغلات زيادة عن اللزوم .. والعصبية وضربة البوز ( مكشر ) متل ما بيقلولي

▂▂▂▂

✿  ندمان انك دخلت طب .. لو بيرجع فيك الزمن بعقليتك الحالية بتدرس طب ؟

ندمان .. بس ما بعرف كيف بدك قلك مو الندم اللي ممكن يخليني لو رجع الزمن ما فوت طب

▂▂▂▂

✿  شو ناوي بعد التخرج من الناحية الدراسة ؟

ناوي اختص طبعاً سواءً هون بسوريا أو برة .. حاطط ببالي ضمن مجال الباطنة خيارات هي العصبية، الهضمية والقلبية .. هلأ العصبية اذا دخلتها ممكن ادخلها بناءً على نصائح بعض الناس اللي بيعزوا عليي و قالولي انه بمشي فيها وممكن ببدع

▂▂▂▂

✿ مظهر انت من الناس اللي وقفت سنة .. هالشي أزعجك بشكل عام ، وأي دفعة أحلى الماضية ولا الحالية ؟

لا ما تدايقت .. لأني ما قضيتها قاعد بدون شغل
الدفعة الحالية أحلى بكتير .. اليوم وبكرة وبكل يوم حيكون هاد رأيي لأنه دفعة فيها كتير من الصداقة والتفاهم

▂▂▂▂

✿  قلت انه ما قضيت السنة بدون شغل ، بشو استغليتها ؟

درست فصل كامل بمدرسة .. درست مواد الرياضيات وعلوم للبكلوريا بمدرسة للبنات

▂▂▂▂

✿  احكيلنا شي موقف صار معك بالمدرسة ما بتنساه ؟

بيوم من الأيام كانت اصبعي مجروحة .. وحاطط لزيقة طبية عليها بقا لما فتت ع الصف ووقفوا الطالبات .. ما لقيت غير بنت حلوة وكانت شاطرة قاعدة بأول صف قامت من كرسيها وصارت تشاورلي بإصبعها .. شو القصة !؟ طلع كمان اصبعها مجروح .. حسيت بخجل يوميتها وضحكت يمكن لأول مرة بالمدرسة مع الطالبات

▂▂▂▂

✿  ممكن تضحي بحياة سعيدة برة وحالة مادية ممتازة ، كرمال تبقى بالوطن ع وضعه ؟

بغض النظر عن الحالة المادية .. الواحد بيدور ع راحته وأكيد اذا توفرت الراحة وين ما كان رح اركض الها

▂▂▂▂

✿  طبخ البيت أم المطاعم ؟ واذا الأولى شو الأكلات اللي بتحبها ؟

طبخ البيت طبعاً .. البطاطا المقلية هي العشق الأول وبحب المحاشي والكبسة

▂▂▂▂

✿  شخصية مشهورة بتتمنى تقابلها وتتصور معاها ؟

أحمد الشقيري

▂▂▂▂

✿  حكمتك بالحياة ?

عامل الناس كما تحب أن يعاملوك

▂▂▂▂

✿  شو اللي ممكن يخلي عين مظهر تدمع ؟

دمعة أمي و الحالي اللي وصلوله الناس

▂▂▂▂

✿  طلع عليك لقب تان تان .. شو قصة هاللقب ؟

هاد اللقب طلعه عليي د. سعد الفرطوسي :D ، وهو اسم لشخصية كرتونية .. بطل هالشخصية بيضل شعره واقف من النص والدكتور شاف انه بيشبهني .

▂▂▂▂

✿  كيف علاقتك مع الأفلام والمسلسلات الأجنبية ؟

مع الأفلام قصة طويلة .. بس مالي بالمسلسلات، الآكشن أول شي عندي .. بعده دراما وثالث شي بالرومانسي

▂▂▂▂

✿  بتسمع أغاني كتير ؟ مين مطربك المفضل ؟

يب بسمع .. كاظم ، جورج وسوف ، وائل كفوري بالترتيب

▂▂▂▂

✿  موقف بالمدرسة ما بتنساه ؟

مرة رجعت من الاستراحة .. فتحت الشنطة وانصدمت انه في رسالة من بنت .. طبعاً مرت الأيام وما عرفت مين هي بس الفيلم أنَّه المدرسة كلها انطبلت بالقصة .. كل الأساتذة وقتها والمدير عرفوا :( وكانوا ينادولي ابو البنات أو ابو الرسائل .. من سنتين مثلاً لما نزلت شفت اكتر من استاذ ونادولي اهلين بالدكتور ابو الرسائل .

✿ بوليوود × هوليوود

هوليوود

▂▂▂▂

✿ الليل × الصبح

الصبح

▂▂▂▂

✿ الدجاج × اللحمة

اللحمة

▂▂▂▂

✿ فرحة وحزن × فرحتين وحزنين

فرحة وحزن

▂▂▂▂

✿ خالة مرت اب × زوج أم ( مين أصعب )

زوج أم

▂▂▂▂

✿ الواقع × الحلم

الحلم

▂▂▂▂

✿ التفاؤل الكاذب × التشاؤم الصادق

التفاؤل الكاذب

▂▂▂▂

✿ تحب × تنحب

أنحب

▂▂▂▂

✿ 3بـ1 × ميلو

3بـ1 .. بتذكرني بالطب

▂▂▂▂

✿ سعد الفرطوسي × سامر الآغا

سامر الآغا

▂▂▂▂

✿ برشلونة × ريال مدريد

ريال مدريد

▂▂▂▂

✿ شاي × قهوة

شاي

▂▂▂▂

✿ كابتن ماجد × كابتن رابح

كابتن رابح ( كرمال لوكا )

.
.

✿ أحمد الصياح

إنسان خدوم مُتعاون بيحب الخير للكل .. سلبيته : دائماً بيحط الطب بكل شي وعامل متل الضمير الحي اللي دايماً يأنبك بالوقت اللي انت بتكون راضي عن حالك

▂▂▂▂

✿ مرام سليمان

شو بدي اكتبلك عن مرام ؟ بدها كاسة شاي ، من أكثر الناس اللي اختلطت معها وعرفت شو معدنها .. إنسانة محترمة وبكتير من الأوقات مرحة مع بعض السلبة .. بتحب تتعلم بس الحظ مو دايماً بيسعفها .. والحديث يطول .

▂▂▂▂

✿ أحمد الجنادي

ما شاء الله .. المبتسم دوماً ومتل ما قال صياح بحسه ( الطير الذي يرقص مذبوحاً من الألمِ ) ، وهو فاكهة الدفعة

▂▂▂▂

✿ محمد الغصين

المدعو غصن ع قولة أخونا جندل .. حبيب الشعب ، بتلاقيه بحاله ماله مشاكل مع حدا وما بيقرب صوب حدا .. بس اذا بيطلعني بالسوزوكي تبعه دورة بكون ممنونه

▂▂▂▂

✿ نادين نعيم

يمكن موقف او موقفين بس اللي تخالطت معها فيهن .. بس خلوني اعرف اني قدام شخصية كتير راقية

▂▂▂▂

✿ محمد الطيبي

من الناس اللي تعرفت عليهم من جديد وبصراحة تشرفت بمعرفته .. محترم جداً بيعجبني هدوءه ودرجة العلم اللي عنده

▂▂▂▂

✿ مروة هنا

الوجه الضحوك بالدفعة .. متواضعة وقريبة للقلب ، سلبيتها : أنه ما بنشوفها كتير

▂▂▂▂

✿ ربى الجهماني

طيبة ، بريئة ، روحها طفولية ، من الناس القليلة اللي بتلاقيها بهالصفات .. سلبيتها : لا مبالية من ناحية الدراسة

▂▂▂▂

✿ زهير جمعة

عميد ومن كبارية الدفعة .. إنسان خدوم وأكابر ، سلبيته : مضيع وقته ع شغلات المفروض ما يضوع وقت عليها

▂▂▂▂

✿ وكيرو ( وكاع + خيرو )

هما ليس شخصان بل شخص واحد .. أروع مثال شفته للصداقة والإخوة .. في زمن من الصعب أن تجد بقيمة هالصداقة

.
.